அது... இது... எது...
சிறப்பு விருந்தினர்களாகவே சின்னத்திரையில் தலைகாட்டிய பிரபலங்கள் பலரை போட்டியாளர்களாக அறிமுகப்படுத்த தயாராகி விட்டது விஜய் டிவி. முற்றிலும் ஒரு காமெடிப் படைப்பான அது இது எது நிகழ்ச்சியில் இந்த பிரபலங்கள் பங்கு பெறுகிறார்கள்!
சின்னத்திரை நட்சத்திரங்களான வெங்கட், தீபக், நேத்ரன், டிங்கு, ராஜ்கமல், பாலாஜி, திரைப்பட நடிகர்களான விஜய் வசந்த், நிதின்சத்யா, நடன இயக்குனர்களான அஷோக் ராஜா, ஜானி, பின்னணி இசைப் பாடகர்களான சாருலதா, மதுமிதா மற்றும் பலர் இந்நிகழ்ச்சியில் பங்கு பெறுகின்றனர் என்பது குறிப்பிடத்தக்கது. வாரம் மூன்று நட்சத்திரங்கள் பங்கு பெறுகிறார்கள். நிகழ்ச்சியின் மற்றுமொரு முக்கிய கதாபாத்திரமாக `லிப்ட்' பங்கு பெறுகிறது.
"அது... இது... எது'' நிகழ்ச்சி முற்றிலும் மாறுபட்ட ஒரு விளையாட்டுப் போல அமைந்திருப்பதே இதன் சிறப்பு அம்சமாகும். `குரூப் ல டூப்', `சிரிச்சா போச்சு', `பொய் சொல்லப் போறோம்' என்ற மூன்று நகைச்சுவை சுற்றுக்கள் இந்நிகழ்ச்சியில் இடம் பெறுகிறது.
`குரூப் ல டூப்' சுற்றில் லிப்டிலிருந்து அச்சு அசலாய் ஒரே தோற்றமுடைய மூவர் வருவர்! அவர்களிடமிருந்து டூப்பான ஒருவரை சரியாக கண்டுபிடிக்கும் நட்சத்திரத்திற்கு மதிப்பெண் சென்றடையும்.
`சிரிச்சாப்போச்சு' சுற்றில் லிப்டில் இருந்து மிமிக்ரி, ஜோக்குகள் செய்யும் சிலர் வந்து நட்சத்திரங்களின் முன் பலவித நகைச்சுவை நிகழ்வுகளை புரிவர். எந்த நட்சத்திரம் ஜோக்குகளுக்கு சிரிக்காமல் சாந்தமாக இருக்கிறாரோ அவருக்கே கூடுதல் மதிப்பெண் வழங்கப்படும்.
மூன்றாவது சுற்றான `பொய் சொல்லப்போறோம்' சுற்றில், ஒவ்வொரு சிறப்பு விருந்தினரும் ஒரு பொய் கலந்த கதையைக் கூறுவர். பார்வையாளரில் இருந்து யார் ஒருவர் பிரபலம் முன்பு மூன்று பொய்களை சரியாக கண்டுபிடிக்கிறாரோ, அவர் வென்றதாக அறிவிக்கப்படுவார்.
முதன் முறையாக பிரபலங்கள் போட்டியாளர்களாக பங்கு பெற இருக்கும் இந்த நிகழ்ச்சி, இன்று இரவு 7 மணிக்கு விஜய் டிவியில் காணலாம்.
Bookmarks