விளையாட்டுச் செய்தித் துளிகள்...

§ மேற்கு வங்க மாநிலம் சிலிகுரியில் நடைபெற்று வரும் 68-வது சந்தோஷ் டிராபி கால்பந்து போட்டி யில் தமிழக அணி 3-2 என்ற கோல் கணக்கில் பஞ்சாபை தோற்கடித்து அரையிறுதிக்கு முன்னேறியது. தமிழக வீரர் ரீகன் ஹாட்ரிக் கோல் அடித்தார். மேற்கு வங்கம்-ரயில்வே அணிகளுக்கு இடையிலான மற்றொரு ஆட்டம் 1-1 என்ற கோல் கணக்கில் டிராவில் முடிந்தது.

§ ஆசிய கோப்பை கிரிக்கெட் போட்டியில் திங்கள்கிழமை நடைபெற்ற ஆட்டத்தில் இலங்கை அணி 129 ரன்கள் வித்தியாசத்தில் ஆப்கானிஸ்தானை தோற்கடித்து இறுதிச் சுற்றுக்கு முன்னேறியது. முதலில் பேட் செய்த இலங்கை அணி 6 விக்கெட் இழப்புக்கு 253 ரன்கள் எடுத்தது. பின்னர் ஆடிய ஆப்கானிஸ்தான் 124 ரன்களில் சுருண்டது.

§ ஆசிய கோப்பை கிரிக்கெட் போட்டியில் இன்று நடைபெறும் ஆட்டத்தில் வங்கதேசத்தை சந்திக்கிறது பாகிஸ்தான்.

§ ஜெர்மனியின் முல்ஹெய்ம் அன்டெர் ரூர் நகரில் நடைபெற்ற ஜெர்மன் ஓபன் பாட்மிண்டன் போட்டியில் இந்தியாவின் அரவிந்த் பட் சாம்பியன் பட்டம் வென்றார்.

§ ஆடவர் இரட்டையர் தரவரிசையில் இந்தியாவின் ரோஹன் போபண்ணா 4 இடங்கள் முன்னேற்றம் கண்டு 12-வது இடத்தைப் பிடித்தார். லியாண்டர் பயஸ் தொடர்ந்து 10-வது இடத்தில் உள்ளார்.

§ உத்தரப்பிரதேச தலைநகர் லக்னெளவில் நடைபெற்று வரும் ஹாக்கி இந்தியா சீனியர் ஆடவர் ஹாக்கி சாம்பியன்ஷிப் போட்டியில் பெங்கால் 5-0 என்ற கோல் கணக்கில் மிசோரமை தோற்கடித்து தொடர்ச்சியாக 2-வது வெற்றியைப் பதிவு செய்தது.