Quote:
புதிதாய் பிறப்போம்
"நாளைய சமூககுற்றவாளிகள் அத்தனைபேருமே இன்று நாம் கவனிக்காமல் விட்ட சின்னஞ்சிறுவர்கள் தான்'' என்கிறார், டைரக்டர் செல்வநாயகம். இவர் இயக்கத்தில் உருவாகியிருக்கும் `புதிதாய் பிறப்போம்' குறும்படத்தில் தான் இப்படியொரு சமூக எச்சரிக்கையை பதிவு செய்திருக்கிறார்.
சமூகஅக்கறையுடன் கூடிய விஷயங்களை திரைப்படங்களில்தான் தரவேண்டுமென்றில்லை. பொட்டில் அடித்தமாதிரி குறும்படங்களிலும் சொல்லலாம். அப்படியொரு சமூக அக்கறையுடன், கவனிக்கப்படாமல்போகும் சிறுவர்-சிறுமிகளின் வாழ்க்கை எந்த கோணத்தில் போகும் என்பதை தெளிவுபடுத்தியிருக்கிறார், தனது இந்த படைப்பின் மூலம்.
"அந்த அனாதைச் சிறுமி ஒரு `தப்பான' பாட்டியின் ஆதரவில் வாழ்கிறாள். ஒரு கட்டத்தில் பாட்டியிடம் இருப்பது ஆபத்தில் முடியும் என்பது அவள் பிஞ்சு மனசில் உணர்த்தப்பட, அங்கிருந்து தப்பிவிடுகிறாள். அவள் போய்ச்சேர்ந்த இடம் முனிவர் மாதிரியான ஒரு தாத்தாவின் இருப்பிடம். அந்த தாத்தா இந்த சிறுமியின் எதிர்காலம் கருதி அவளை ஒரு சமூகசேவகியிடம் சேர்ப்பித்து அவளது சிறப்பான எதிர்காலத்துக்கு வகை செய்கிறார்.
இந்த பின்னணியில் கதை சொன்ன காரணமே உங்கள் பிள்ளைகள்தான் என்றில்லை, எங்காவது கவனிக்கப்படாத நிலையில் ஒரு சிறுவனோ சிறுமியோ உங்கள் கண்களில் அடிக்கடி பட நேர்ந்தால் கூட, மனிதநேயத்துடன் அவர்களுக்கு முடிந்த ஒரு எதிர்காலம் அமைய உங்களாலானதை செய்யுங்கள் என்பதை வலியுறுத்தத்தான்.''
உற்சாகமாக சொல்லும் இயக்குனர் செல்வநாயகம், இந்த குறும்படத்தில் நாயகியாக நடித்த மனிஷாவையும் பாராட்டத் தவறவில்லை. "என் கதையின் நாயகி கேரக்டருக்கு பல சிறுமிகளை பார்த்தேன். `நடிப்பு வந்தால் முகவெட்டு சரியில்லை. முகவெட்டு சரியாக இருந்தால் நடிப்பு தூரம்' என்று முதலில் மனதளவில் ரொம்பவே நொந்து போய் விட்டேன். என்றாலும் பள்ளியில் 9-வது படித்துக்கொண்டிருந்த மனீஷாவை பார்க்க நேர்ந்தபோது மனிஷாவுக்காக என் கதையின் நாயகி வயதைக்கூட கொஞ்சம் தளர்த்திக்கொண்டேன். என்மனதில் இருந்த சிறுமி கேரக்டருக்கு அற்புதமாக உயிர்கொடுத்து விட்டார் மனீஷா. இப்போது ஒரு படம் இயக்கவாய்ப்பு வந்திருக்கிறது. என் படத்திலும் மனிஷாவுக்கு முக்கியகேரக்டர் உண்டு
டைரக்டர் இப்படி பாராட்டும் மனிஷா நடிப்புக்கு புதுமுகம் இல்லை. படிப்பைத் தொடர்ந்து கொண்டு சிறுபிராயத்தில் இருந்தே நடிப்பையும் தொடர்கிறார். ஏவி.எம்.மின் நிம்மதி, நாணயம், சவாலே சமாளி, சொர்க்கம், தீர்க்கசுமங்கலி, டைரக்டர் விக்ரமாதித்தன் இயக்கத்தில் கெட்டிமேளம், மலர்கள், விஜய் டிவியில் காத்து கறுப்பு, காக்க காக்க, கண்டேன் சீதையை, மெகா டிவியில் தர்மயுத்தம் என்று நடிப்புப் பட்டியல் நீள்கிறது. இந்த குறும் படம் விரைவில் தனியார் சேனல் ஒன்றில் ஒளிபரப்பாகிறது.